August 22, 2009

സത്യമേവ ജയതേ! 'സച്‌ കാ സാമ്‌നാ' ഭീ



ഏകകണ്‌ഠമായ ഒരഭിപ്രായം നമ്മുടെ സഭകളിലുണ്ടാവുകയെന്നത്‌ വാല്‍നക്ഷത്രം പ്രത്യക്ഷമാവുന്നതുപോലെ അപൂര്‍വ്വം ഒരു സംഭവമാണ്‌. ലോകക്ഷേമാര്‍ത്ഥം അവരവരുടെ ആനുകൂല്യങ്ങള്‍ അവരവര്‍ വര്‍ദ്ധിപ്പിക്കുന്ന കടലാസ്‌ മേശപ്പുറത്തുവരുമ്പോള്‍ ഇങ്ങിനെ സംഭവിക്കാറുണ്ട്‌. ദരിദ്രജനകോടികളുടെ സര്‍വ്വൈശ്വര്യങ്ങള്‍ക്കുമായി ഓരോ ടി.വി സെറ്റുകള്‍ അംഗങ്ങള്‍ക്ക്‌ ദാനം നല്‌കാന്‍ തീരുമാനിച്ച ആ സദുദ്യമവേളയിലും ഏതാണ്ട്‌ ഇങ്ങിനെ സംഭവിച്ചിരുന്നു. പാടില്ലെന്നോ മറ്റോ പറഞ്ഞ ഒറ്റപ്പെട്ടവരെ അവിടെയിട്ട്‌ തല്ലിക്കൊന്നില്ലെന്നതു തന്നെ ഭാഗ്യം.

ഇതില്‍ നിന്നും ലേശം വ്യത്യസ്‌തമായ ഒരു പ്രശ്‌നത്തിന്‍മേല്‍ അംഗങ്ങള്‍ ഏകകണ്‌ഠമായി നിലകൊണ്ടു എന്നുകണ്ടപ്പോള്‍ ഞെട്ടിപ്പോയി. 'സച്‌ കാ സാമ്‌നാ' എന്ന ടെലിവിഷന്‍ പരിപാടിക്കെതിരെയാണ്‌ നിലപാട്‌. തികച്ചും വ്യക്തിപരമായ 21 ചോദ്യങ്ങളാണ്‌ പങ്കെടുക്കുന്നവരോട്‌ ചോദിക്കുക. ഉത്തരം സത്യമല്ലെങ്കില്‍ ലൈ ഡിടക്ടര്‍ കളവാണെന്നു കാണിക്കും. ഉത്തരം മുഴുവനും സത്യമാണെങ്കില്‍ കിട്ടുക ഒരു കോടിയും. 'Moments of Truth' എന്ന അമേരിക്കന്‍ ടെലിവിഷന്‍ പരിപാടി കാപ്പിരികള്‍ കോപ്പിയടിച്ചതാണ്‌ സച്‌ കാ സാമ്‌നാ. പ്രശ്‌നം സായിപ്പിനെ കാപ്പിരി കോപ്പിയടിച്ചതല്ല. കോടികൊടുത്തോ കോടി പുതപ്പിച്ചോ കോണിയിറക്കുന്നതുമല്ല.

21 ചോദ്യങ്ങള്‍ക്കും സത്യവും കൃത്യവുമായ മറുപടി പറയുമ്പോഴേക്കും ഭാരതീയസംസ്‌കാരത്തിന്റെ അടിത്തറ കുളംതോണ്ടിപ്പോവും എന്നതാണ്‌ പ്രശ്‌നം. ഭാരതീയ സംസ്‌കാരത്തിന്റെ ആ സുന്ദരസൗധം നിലംപൊത്താതിരിക്കാന്‍ പരിപാടിക്ക്‌ തടയിടണം എന്നൊരഭിപ്രായമാണ്‌ അംഗങ്ങള്‍ ഏകകണ്‌ഠരായി, നിരുദ്ധകണ്‌ഠരായി പ്രകടിപ്പിച്ചത്‌. സംഘപരിവാരത്തിന്റെ പരാക്രമമായിരിക്കുമെന്നാണ്‌ കേട്ടപ്പോള്‍ ആദ്യം തോന്നിയത്‌. മൊയ്‌തുപാലത്തിന്റെ അതേ അവസ്ഥയിലാണ്‌ ഭാരതീയ സംസ്‌കാരവും എന്ന ഉറച്ചവിശ്വാസത്തിലാണ്‌ മൊത്തം അംഗങ്ങളുമെന്ന്‌ മനസ്സിലായത്‌ പിന്നീടാണ്‌. ഒരു 1210 ചോദ്യം വന്നാല്‍ തീര്‍ന്നു കഥ. ഭാരതീയ സംസ്‌കാരം നിലംപൊത്തി.

മെക്കാളെ പ്രഭുവും കൂട്ടാളികളും ആവുംപോലെ ഉത്സാഹിച്ചിട്ടും തകര്‍ന്നുപോവാത്തത്‌ ഇനി തുക്കടാ ചാനലുകാര്‍ തകര്‍ത്തുകളഞ്ഞാലോ. അമേരിക്കന്‍ സംസ്‌കാരത്തില്‍ നിന്നും കടം കൊണ്ടതാകയാല്‍ സംഗതിക്ക്‌ ഒരു നിയന്ത്രണമൊക്കെവേണം എന്നതായിരുന്നു സിഎന്‍എന്‍-ഐബിഎന്‍ ചര്‍ച്ചയിലെ മുഴുവന്‍ പൊതുപ്രവര്‍ത്തകരുടെയും നിലപാട്‌. അങ്ങിനെയാണെങ്കില്‍ സത്യം പറയുക എന്നത്‌ ഇന്ത്യന്‍ സംസ്‌കാരത്തിന്റെ ഭാഗമല്ല എന്നാണോ എന്നതായിരുന്നു സിദ്ധാര്‍ത്ഥബസുവിന്റെ ചോദ്യം.

ഉത്തരമില്ലാത്ത ചോദ്യമാവുമ്പോള്‍ എന്തുകൊണ്ടും നല്ലത്‌ ആ ചോദ്യത്തെ അര്‍ഹിക്കുന്ന അവഞ്‌ജയോടെ തള്ളിക്കളയുകയാണ്‌. സമാജ്‌ വാദിപാര്‍ട്ടി പ്രതിനിധിയും ബീജേപീ പ്രതിനിധിയും ചെയ്‌തതും അതുതന്നെ. അര്‍ഹിക്കുന്ന അവജ്ഞയോടെ അവരെല്ലാം കൂടി ചോദ്യത്തെ തള്ളി ഇസഡ്‌ കാറ്റഗറിയിലുള്ള ഭാരതീയസംസ്‌കാരത്തിന്‌ സംരക്ഷണഭിത്തി പണിതു.

വ്യക്തിപരം, ഔദ്വോഗികം, ശാരീരികം, ലൈംഗീകപരം - ചോദ്യങ്ങളെല്ലാം ഈ വകുപ്പില്‍ പെടുന്നതായിരിക്കും. അതുതന്നെയാണ്‌ കുഴപ്പവും. രണ്ടാമതുവരുന്ന ഔദ്വോഗികവും നാലാമതുവരുന്ന ലൈംഗീകവും ചില്ലറക്കേസല്ല. രണ്ടിനും സത്യസന്ധമായി ഉത്തരം പറഞ്ഞ്‌ എത്രമഹാന്‍മാര്‍ കോടികളുമായി പോവുമെന്നതാണ്‌ അറിയേണ്ടത്‌. തലയ്‌ക്കുമീതേ ശൂന്യാകാശം താഴേ മരുഭൂമീ എന്നത്‌ ജീവിതത്തില്‍ പകര്‍ത്തിയവരാവുമ്പോള്‍ ഒന്നും സംഭവിക്കാനില്ല. അല്ലെങ്കില്‍ ടീവിയില്‍ ഉത്തരം സത്യസന്ധമായി നല്‌കുമ്പോള്‍ സ്വന്തം ബന്ധങ്ങളുടെ നാലുകെട്ടുകളായിരിക്കും നടുമുറ്റത്തേക്ക്‌ നിലംപൊത്തുക.

ആദ്യഘട്ടം പരിപാടിതന്നെ ശുഭപര്യവസായിയായി കലാശിച്ചു എന്നാണുകേട്ടത്‌. പങ്കെടുത്ത മദ്ധ്യവര്‍ഗവീട്ടമ്മയോട്‌ ചോദിച്ചത്‌ നിരുപദ്രവകരമായ ഒരു ശോദ്യായിരുന്നു. ഭര്‍ത്താവിനുപുറമേ മറ്റാരെങ്കിലുമായി ഭവതി കിടക്കപങ്കിട്ടുവോ എന്നുമാത്രം. ഇല്ലെന്നു മഹതി. ഉണ്ടെന്ന്‌ യന്ത്രം. ലൈ ഡിടക്ടര്‍ ഇടിത്തീയായി തലയില്‍ പതിച്ചു. ആ സത്യത്തിന്റെ ചിറകേറി വന്നതാവട്ടേ ഒന്നാംതരം ലക്ഷണമൊത്തൊരു ഡിവോഴ്‌സ്‌ നോട്ടീസും.

സംഗതി ഇങ്ങിനെയായ സ്ഥിതിക്ക്‌ നാളെ എന്താണ്‌ സംഭവിക്കുക എന്നതു മുന്‍കൂട്ടി കാണാനുള്ള കഴിവിനാണ്‌ ഇംഗ്ലീഷില്‍ ഉള്‍ക്കാഴ്‌ച എന്നും മലയാളത്തില്‍ ഫൊര്‍സൈറ്റ്‌ എന്നും പറയുക. ചാനലുകാരുടെ കാമറ കാണുമ്പോള്‍ ഞാന്‍ ഞാന്‍ മുമ്പില്‍ എന്നു തിക്കിത്തിരക്കി കയറുന്നവര്‍ ഇനി തൂക്കിക്കൊന്നാലൂം അങ്ങോട്ടുകയറി നാലു സത്യം പറയില്ലെന്നുപറഞ്ഞാല്‍ പിന്നെ ജനം വെറുതേ വിടുമോ? ഇനി ക്ഷണിച്ചിട്ടും നാലു സത്യം പറയാന്‍ വരാത്തവരുടെ പട്ടിക നിത്യേന ഫ്‌ളാഷായി പ്രദര്‍ശിപ്പിച്ചാല്‍ ചാനലുകാരനെ തൂക്കിക്കൊല്ലാനെന്താ ഇവിടെ മുല്ലാ ഒമറുടെ ഭരണമൊന്നുമല്ലല്ലോ?

'ജീവിതം മലര്‍ക്കെ തുറന്ന പുസ്‌തകമായ' എണ്ണപ്പെട്ട ഏതാനും പൊതുപ്രവര്‍ത്തകരുടെ 21 ഉത്തരം ജനങ്ങളെയൊന്ന്‌്‌ കേള്‍പ്പിക്കണമെന്ന ആഗ്രഹം എന്നെങ്കിലും ഏതെങ്കിലും തലതിരിഞ്ഞവന്‌ തോന്നിക്കൂടായ്‌കയില്ല. ആര്‍ക്കാ എപ്പഴാ എന്താ തോന്നിക്കൂടാത്തത്‌ എന്നൊന്നും പറയാന്‍ പറ്റില്ലല്ലോ. അഥവാ ഇനി വല്ലവന്റെയും സ്‌നേഹപൂര്‍വ്വമായ ഭീഷണിക്കു വഴങ്ങി ഉത്തരം നല്‌കേണ്ടിവന്നാല്‍ അന്നടയുന്ന ആ മഹദ്‌ ഗ്രന്ഥം പിന്നീടൊരിക്കലും തുറക്കേണ്ടിയും വരില്ല.

ഇനി വേറെ വലിയോരു തലയിലെ ചെറിയോരു ബുദ്ധിയില്‍ ഇങ്ങിനെ തോന്നുന്നു എന്നു കരുതുക. പൊതുപ്രവര്‍ത്തകാര്‍ക്കായി മാത്രം ഒരു സ്‌ച്‌ കാ സാമ്‌നാ. ഓരോ സത്യസന്ധമായ ഉത്തരത്തിനും രണ്ടുകോടി. മൊത്തം ഇരുപത്തിയൊന്ന്‌ സത്യത്തിനും കൂടി 42 കോടി. ഓരോ കളവിനും പിഴയായും രണ്ടുകോടി. അവനവനുമാത്രം അറിയുന്ന ചോദ്യം മാത്രമേ ഉണ്ടാവൂ. എവറസ്‌റ്റിന്റെ ഉയരവും മറീനാട്രഞ്ചിന്റെ ആഴവും ചോദ്യമായി കയറിവന്ന്‌ കച്ചറയുണ്ടാക്കുകയില്ല. സ്വിസ്‌ ബാങ്കുകളിലുള്ള നിക്ഷേപം ഇന്ത്യയിലേക്ക്‌ തിരച്ചെത്തിക്കാനുള്ള ഒരു മാര്‍ഗം കൂടിയായും ഈ അഗ്നിപരീക്ഷയെ ഉപയോഗിക്കാം.

ഉദാഹരണമായി ചോദ്യം 1. ഇന്ത്യക്ക്‌ പുറത്ത്‌ വല്ല നിക്ഷേപവുമുണ്ടോ?
പീഢനക്കേസുകളുമായി അറസ്റ്റിലായ എം.എല്‍.എയെപ്പോലുള്ളവരാണെങ്കില്‍ ചോദ്യം 1. നാളിതുവരെയായി എത്ര ബലാല്‍സംഗം നടത്തിയിട്ടുണ്ട്‌? (10 മിനിറ്റ്‌ സമയവും ആവശ്യമാണെങ്കില്‍ ഗണിച്ചുകണ്ടെത്താന്‍ ഒരു കാല്‍കുലേറ്ററും അനുവദനീയം)

അങ്ങിനെയൊരു ദുരന്തസാദ്ധ്യത മുന്നിലുണ്ടാവുമ്പോള്‍ എന്തുകൊണ്ടും നല്ലത്‌ ഈ നശിച്ച പരിപാടി പൂട്ടിക്കാന്‍ ആവുംവണ്ണം ഉത്സാഹിക്കുകയാണ്‌. സ്വന്തം നിലയ്‌ക്കുനോക്കുക. കോടതിവഴിയും. അല്ലെങ്കില്‍ വിവേകം മാത്രമല്ല പടച്ചോന്‍ ഇക്കൂട്ടര്‍ക്ക്‌ ബുദ്ധിയും കൊടുത്തില്ലല്ലോ എന്ന തോന്നലല്ലേ ജനത്തിനുണ്ടാവുക.

`പിടിയാത്തവരുടെ വികൃതികള്‍ കണ്ടാല്‍
മടിയാതവരുടെ തലമുടി ചുറ്റി
പിടിയാത്തവനതി ഭോഷന്‍
വടികൊണ്ടടിയാത്തവനതിനേക്കാള്‍ ഭോഷന്‍`

അക്കാര്യത്തില്‍ മഹാത്മജികൂടി കുഞ്ചനോടു യോജിക്കും. അഹിംസാവ്രതം തല്‌ക്കാലം മുറിഞ്ഞാലും ഇത്രനല്ലൊരു സംഗതി നിരോധിക്കാന്‍ പുറപ്പെടുന്നവരുടെ നടുപ്പുറത്തേക്ക്‌ മഹാത്മാവിന്റെ ഊന്നുവടി ഉയരാതിരിക്കാന്‍ കാരണമൊന്നും നിത്യന്‍ കാണുന്നില്ല.

August 03, 2009

ഒരു ദരിദ്ര 'മഹാരാജാവും' സമ്പന്ന സേവകരും

air india.jpgസേവകരുടെ എണ്ണം കൂടിപ്പോയി. 'മഹാരാജാവ്‌' കടത്തിലായി. അല്ലെങ്കില്‍ സേവകര്‍ നാവടക്കി പണിയെടുത്തില്ല. മഹാരാജാവ്‌ കുത്തുപാളയെടുത്തു. സേവകരുടെ ഒടുക്കത്തെ മുദ്രാവാക്യം വിളി ഹേതുവായി കമ്പനി പൂട്ടി താക്കോലുമെടുത്ത്‌ ആത്മരക്ഷാര്‍ത്ഥം മഹാരാജാവ്‌ വടക്കോട്ടേക്ക്‌ പലായനം ചെയ്‌തു. ഈ മഹാരാജാവിന്റെ ആസ്ഥാനം കേരളത്തിലാണെങ്കില്‍ പണ്ടേ രക്ഷപ്പെട്ടേനെ. കുത്തുപാളയെടുത്തതിന്റെ കാരണങ്ങള്‍ക്കുമാത്രം ക്ഷാമമുണ്ടാകുമായിരുന്നില്ല.

ദി സെയിം മുഴക്കോലുകൊണ്ട്‌ എയര്‍ഇന്ത്യയെ ഇപ്പോള്‍ ആര്‍ക്കും അളക്കേണ്ടതില്ല. മഹാരാജാവിന്റെ അംഗരക്ഷകന്‍മാര്‍ പറയുന്നത്‌ സത്യമാണെങ്കില്‍ നശിച്ച കേരളവുമായി ബന്ധമില്ലാതെതന്നെ എയര്‍ഇന്ത്യ 5000 കോടിയുടെ കടത്തിലാണ്‌.

ആരെ നന്നാക്കിയിട്ടാണ്‌ ഇങ്ങിനെ കടത്തില്‍ പുയിത്തുപോയത്‌ എന്ന്‌ തലയ്‌ക്ക്‌ സ്ഥിരതയുള്ള ആരും ചോദിച്ചുപോവും. രാവണന്റെ ഈ ആകാശനൗകയിലാവട്ടെ വൈശ്രവണന്‍മാരല്ലാതെ ഒരൊറ്റ കുചേലനും കയറി കടം പറഞ്ഞ ചരിത്രമില്ല.

വ്യോമമാര്‍ഗം ഈ ശകടം ഗമിക്കുന്ന നേരം, സ്വമേധയാ വല്ലപ്പോഴും ഒന്ന്‌ ഭൂമിയിലുള്ളവര്‍ക്ക്‌ ദര്‍ശനം നല്‌കുന്ന ആ അനര്‍ഘനിമിഷങ്ങളില്‍ കെട്ടിയോളെയും കുട്ട്യേളെയും കൂട്ടി ദരിദ്രവാസികള്‍ പറമ്പിലിറങ്ങി നിരന്നുനിന്ന്‌ വലംകൈ കണ്ണിനു സമാന്തരമായി പിടിച്ച്‌ മുകളിലേക്ക്‌ നോക്കി അതാണു മക്കളേ 'ബിമാനം' എന്നു പറഞ്ഞതുകൊണ്ടും, അനുസരണയില്ലാത്ത ദരിദ്രപ്പിള്ളേര്‍ കുതറി ബിമാനത്തിനു പിന്നാലെയോടി കൂക്കിവിളിച്ചതുകൊണ്ടും ഊരിപോവുന്ന കളസം ഇടംകൈകൊണ്ട്‌ യഥാസ്ഥാനത്തുനിര്‍ത്താന്‍ പാടുപെട്ട്‌ വലംകൈയ്യില്‍ ചരലുവാരി വായുവില്‍ ചരലാര്‍ച്ചന നടത്തിയതുകൊണ്ടും തന്നെ 'മഹാരാജാവി'നുണ്ടായ നഷ്ടം ചില്ലറയല്ല എന്നാണെങ്കില്‍ രക്ഷയില്ല. ദരിദ്രവാസികളല്ലേ കാരണം. ഖജനാവുതന്നെ ശരണം.

ഇനി സ്വന്തം നിലയിലുള്ളതും ആരാന്റേത്‌ പാട്ടത്തിനെടുത്തതുമായി 147 എയര്‍ക്രാഫ്‌റ്റുകളാണുള്ളത്‌. 147 വണ്ടിയുടെ നടത്തിപ്പിനായി 45 ഡയറക്ടര്‍മാരുണ്ട്‌. 45 ഡയറക്ടര്‍മാര്‍ നിരന്നുനിന്നു 45 ഡയറക്ഷനുകളിലേക്ക്‌ ഒരോരുടേയും ശേഷിക്കനുസരിച്ച്‌ കെട്ടിവലിച്ചു എന്നുവേണം കരുതാന്‍. ഡയറക്ടര്‍മാരുടെ എണ്ണം കൊണ്ട്‌ ഒരു കമ്പനിയും പച്ചപിടിച്ചതായി ചരിത്രത്തിലില്ല. കുത്തുപാളയെടുത്തുപോയതല്ലാതെ.

വേസ്റ്റ്‌ മാനേജ്‌മെന്റുകൂടി പഠിച്ച മിടുക്കന്‍മാരുള്ള ഈ സുവര്‍ണകാലത്ത്‌ ഇത്രയെണ്ണം വേസ്റ്റാണ്‌ അവരെ വേസ്റ്റ്‌ബിന്നിലേയ്‌ക്ക്‌ മാറ്റേണ്ട കാലം അതിക്രമിച്ചു എന്നൊരു നോട്ട്‌ ഒരു വിദഗ്‌ദ്ധനും എഴുതാത്തതാണ്‌ വിനയായത്‌. സ്വാഭാവികമായും അനിവാര്യമായത്‌ സംഭവിച്ചു. എല്ലാവരും കൂടി ഒടുക്കം മഹാരാജനെ കുളിപ്പിച്ചുകിടത്തി.

സ്വന്തം വിമാനങ്ങളും താവളങ്ങളും രാഷ്ട്രത്തിനായി സമര്‍പ്പിച്ച ജാംഷേഡ്‌ജി ഇതു കാണാനുണ്ടായിരുന്നെങ്കില്‍ ഒന്നുകില്‍ സകലത്തിനെയും നിരത്തിനിര്‍ത്തി തലയ്‌ക്കുവെടിവെച്ച്‌ ലോകക്ഷേമാര്‍ത്ഥം ജയിലില്‍ പോയാലും വേണ്ടില്ലെന്നു കരുതുമായിരുന്നു, അല്ലെങ്കില്‍ അതിനു കഴിയാത്തതില്‍ മനംനൊന്ത്‌ പിസ്റ്റള്‍ സ്വന്തം തലയ്‌ക്ക്‌ തിരിച്ചുപിടിച്ചിട്ടുണ്ടാകുമായിരുന്നു.

147 വണ്ടിക്ക്‌ മൊത്തത്തില്‍ 31000 ജീവനക്കാരാണുള്ളത്‌. അമിതജീവനക്കാരുടെ ഭാരമാണെന്ന്‌ മാനേജ്‌മെന്റ്‌. അല്ലെന്ന്‌ തൊഴിലാളികള്‍. മൊത്തം 147 മഹാരാജാക്കന്‍മാര്‍ക്ക്‌ 31000 പാദസേവകര്‍ എന്നത്‌ ലേശം കൂടിയ കണക്കാണെങ്കിലും ശമ്പളത്തിന്റെ കണക്കെടുത്താല്‍ പണ്ട്‌ സായിപ്പിന്റെ കാര്യസ്ഥന്‍ പറഞ്ഞതുപോലെയാണ്‌. എനിക്കും ഏമാനും കൂടി 1000 രൂപ. അതായത്‌ ഏമാന്‌ 950 എനിക്ക്‌ 50.

മേല്‍കണക്കുവച്ചാല്‍ ഒരു മഹാരാജാവിന്‌ ശരാശരി 210 പാദുഷമാര്‍ അഥവാ തൊഴിലാളികള്‍. അതിനുപുറമേ ഈ വണ്ടിയെ ആശ്രയിച്ചുകഴിയുന്ന അടുത്തൂണ്‍ പറ്റിയവരുടേയും പന്നിപ്പനിപോലെ ചത്തവരില്‍ നിന്നും അടുത്തൂണ്‍ അവകാശികളിലേക്കു പടര്‍ന്നുകയറിയതിന്റേയും കണക്കുവേറെയും.

തൊഴിലാളികള്‍ പറയുന്നതുപ്രകാരം 80% ജീവനക്കാരും ശരാശരി 15000 രൂപ ശമ്പളക്കാരാണ്‌. അതായത്‌ മൊത്തം ശമ്പളബില്ലിന്റെ 30 ശതമാനം മാത്രമാണ്‌ 80 ശതമാനം തൊഴിലാളികള്‍ക്കായി വേണ്ടത്‌. പ്രതിവര്‍ഷം ശമ്പളമായി മഹാരാജാവ്‌ സേവകര്‍ക്ക്‌ കൊടുക്കുന്നത്‌ 3500കോടി രൂപ. ഈ 3500 കോടിയുടെ 30 ശതമാനം വരുന്ന 1050 കോടി മാത്രമാണ്‌ 31000ല്‍ 80 ശതമാനം വരുന്ന 24800 ജീവനക്കാര്‍ക്കും കൂടി വരിക എന്നു ഗണിതശാസ്‌ത്രം.

അപ്പോള്‍ മൂന്നില്‍ രണ്ടുഭാഗവും പോകുന്ന വഴി അടയണം. അതാരടക്കും. തീയ്‌ക്ക്‌ വിറകുമതിയാവാത്തതുപോലെയാണ്‌ മനുഷ്യന്റെ ആഗ്രഹങ്ങളും. അധികാരം കൂടിയുണ്ടാവുമ്പോള്‍ ആഗ്രഹങ്ങള്‍ കാട്ടുതീയാവുന്നു. വിഭവങ്ങള്‍ വെണ്ണീറാവുന്നു.

എന്തിനുംപോന്ന ഈ 45 ഡയറക്ടര്‍മാര്‍ക്കും പുറമേ കൊള്ളയ്‌ക്കും പിടിച്ചുപറിയ്‌ക്കും അധികാരമുള്ള 108 ജനറല്‍ മാനേജര്‍മാരുമുണ്ട്‌ മഹാരാജാവിന്റെ കാര്യങ്ങള്‍ ഭംഗിയാക്കാന്‍. ഇവരെല്ലാം കൂടി അവരവരാലാവും വണ്ണം മഹാരാജനെ സേവിച്ചു. അവരവര്‍ക്കാവശ്യമുള്ളത്‌ മഹാരാജാവില്‍ നിന്നുമെടുത്തു. ഒന്നാം തരം സോഷ്യലിസ്‌റ്റ്‌്‌ രീതി.

എല്ലാവരും ഇങ്ങിനെ ആത്മാര്‍ത്ഥമായി ഉത്സാഹിച്ചിട്ടും മഹാരാജന്റെ അസ്ഥികൂടം ബാക്കിയായതിന്‌ നമ്മളാരോടാണ്‌ നന്ദി പറയേണ്ടത്‌? അതെങ്കിലും ബാക്കിയാക്കിയതിന്‌ എല്ലാവരെയും ചുരുങ്ങിയത്‌ മുക്തകണ്‌ഠം പ്രശംസിക്കുകയാണ്‌ വേണ്ടത്‌. പറ്റുമെങ്കില്‍ ബെസ്റ്റ്‌്‌ ലീഡര്‍ഷിപ്പ്‌ അവാര്‍ഡോ മറ്റോ സംഘടിപ്പിച്ച്‌ ആള്‍ക്കൊന്നുവീതം കൊടുക്കുകയും വേണം.

എഞ്ചിനീയര്‍മാര്‍ വാങ്ങുന്ന പ്രവര്‍ത്തനലാഭത്തിന്റെ ഇന്‍സന്റീവ്‌ ശമ്പളത്തിന്റെ മൂന്നിരട്ടിയാണെന്നാണ്‌ റിപ്പോര്‍ട്ട്‌. ഇങ്ങിനെ കൊടുത്തുപോറ്റാന്‍ നാട്ടില്‍ കിട്ടാത്ത ചരക്കുകളാണോ എഞ്ചിനീയര്‍മാര്‍? 5000കോടി നഷ്ടത്തിലുള്ള സ്ഥാപനത്തിന്റെ പ്രവര്‍ത്തനലാഭം കണക്കുകൂട്ടുന്ന സാങ്കേതികവിദ്യ വികസിപ്പിച്ചതിനും ആ വിദ്യയെ അടിസ്ഥാനപ്പെടുത്തി ശമ്പളത്തിന്റെ പലമടങ്ങുകള്‍ ഇന്‍സെന്റീവായി കൊടുക്കാന്‍ തീരുമാനിച്ച തലകളും ഈ ദരിദ്രനാടിന്റെ ആദരവര്‍ഹിക്കുന്നു. ഇങ്ങിനെയുള്ളവരെല്ലാം കൂടി പരമാവധി ശ്രമിച്ചിട്ടും അഭ്യന്തരമാര്‍ക്കറ്റില്‍ 17.1 ശതമാനം കൈയ്യിലുണ്ട്‌ എന്നതുതന്നെ ആ മേഖലയുടെ പ്രത്യേകതയാകണം.

45 ഡയറക്ടര്‍മാരും 108 ജനറല്‍മാനേജര്‍മാരും ചൊറികുത്തിയിരിക്കാനുണ്ടായിട്ടും കാലാനുസൃതമായി മാറ്റം വല്ലതും നടത്തിയിരുന്നെങ്കില്‍ മഹാരാജാവിരുന്നിടം സ്വകാര്യ വിദേശ കമ്പനികള്‍ കൈയ്യേറുമായിരുന്നോ? ആളിരിക്കേണ്ടിടത്ത്‌ ആളിരുന്നില്ലെങ്കില്‍ വേറെയേതോ ജീവി ഇരിക്കുമെന്ന്‌ പ്രമാണം.

തിരുവേപ്പതിയോ കേരളാ സോപ്‌സോ മറ്റോ ആണെങ്കില്‍ ഒടുക്കത്തെ പൂട്ടിട്ട്‌ പൂട്ടി കാരണങ്ങളെല്ലാം തൊഴിലാളികളുടെ തലയില്‍ വച്ചുകെട്ടി സ്ഥലം വിടാമായിരുന്നു. പ്രതിഷേധമായി നാലു മുദ്രാവാക്യനിവേദ്യം അര്‍പ്പിച്ച്‌ തൊഴിലാളികളും പിരിയും. പൂട്ടിക്കാന്‍ പാടുപെട്ട യൂണിയന്‍ നേതാക്കള്‍ സ്വീകരണങ്ങളേറ്റുവാങ്ങിക്കൊണ്ട്‌ അടുത്ത വേദിയിലേക്ക്‌ കുതിക്കും. നല്ലകുതിപ്പാണെങ്കില്‍ തൊഴിലാളികളെ മാത്രമല്ല, ചിലപ്പോള്‍ മന്ത്രിമാരായി മുതലാളികളെക്കൂടി രക്ഷിക്കും. എയര്‍ഇന്ത്യയാവുമ്പോള്‍ അതുപറ്റുമോ? ജീവന്‍രക്ഷാമരുന്നായി ഖജനാവുതന്നെ ശരണം.